لو كنت ملاك

لو كنت ملاك ..أنا لسه بشر

عايش فى عتاب وتعب وسهر

ما أقدرش أطير ..ولكني بغير

من كلمة فى صدفة بعتها قدر

لو كنت ملاك ..أنا لسه بشر

****************

لو كنت ملاك ..مخلوق من نور

أنا لسه بشر مجروح مكسور

ياتحب وأعدي معاك السور

ياتصد ويرجع قلبى حجر

لو كنت ملاك أنا لسه بشر

***************

لو كنت ملاك ..أنا لسه إنسان

مخلوق من طين ..معجون بحنان

طول عمري بشوف العشق أمان

أشمعنى معاك العشق خطر

لو كنت ملاك أنا لسه بشر

****************

لو كنت ملاك خليك فى سماك

وأنا هافضل تحت .. وهستناك

أنا راضي القلب يضيع فى هواك

أنا راضي العمر يعدي هدر

لو كنت ملاك أنا لسه بشر

من نظرة عين

بوست جديد على قلم الحرية الأن

أحبته بجنون وتنازلت كثيراً من أجله ، كانت تصيبه الدهشة مع كل تضحية جديدة تقدمها ويتسأل فى نفسه . أ الحب فقط هو مايدفعها إلى كل هذا التفاني والأخلاص ؟؟ ألا تنتظر أي مقابل نظير ماتقدمه له ؟؟ ، لم يكن يعلم حقيقة الأمر ، وان ماوراء كل هذا الحب ليس أكثر من نظرة عين.

نظرة رأتها هى فى عيونه وتفاجأت بها ولكنها سعدت لها كما لم تسعد من قبل ، نظرة حملت كل كلمات الحب وأشعار الغزل ولمسات الحنان ، نظرة لم تستغرق اكثر من بضعة لحظات تأملها بها من خلف ذلك الجدار الزجاجي الذي كان يفصل بينهم حينها.

ولهذة النظرة أحبته .. ولهذة النظرة تحملت الكثير ، تحملت ثورات غضبه ونزاوات أنانيته ونوبات غروره ، كانت كلما أشتد الألم تتذكر النظرة وتهتف فى داخلها " أن الحب الذي نظر لك به يجعلك تغفرين أضعاف هذا ، لقد كانت النظرة صادقة ..والحب الصادق نادر بحق " ، ولكن الأخطاء تزداد وتتضاعف ..والجرح يتسع ويغور ، وهى لم تعتد تحتمل الألم بعد أن أضحت تقضي النهار فى إرضائه وتقضى الليل فى البكاء ، حتى بلغ الأمر الحد الذى لا يمكن عنده التراجع وثارت فى وجهه صارخة بالسؤال الذى يملأ وجدانها ، وتذكر هو ذلك اليوم على الفور ..وتذكر معه تلك النظرة..

وببساطة أخبرها أن الجدار الزجاجى الفاصل بينهم كان يسمع برؤية فى أتجاة واحد ...

وأنه لم يكن ينظر سوى لأنعكاس صورته على الزجاج الأسود.

ساعة غروب

ساعة غروب

الشمس لمت كل ألوان الشفق

ومشيت يادوب

ولقيتها رجعت تانى ومعاها لونين

أحمر عشان يرسم شفايف

وأخضر يبان جوا العنين

يخطف قلوب

احمر عشان يرسم شفايف

والشفايف تترسم

لو تبتسم

تنده على القلب اللى خايف

يوم ينخطف

أو يتقسم

مين اللى قال العشق مفتاح الفرح

انا كل عاشق قابلته فى الدنيا أنجرح

لكن الغريب

الكل قال قسمة ونصيب

ولما تنده الشفايف

بيسلم للسحر العجيب

يمشى وراه .. مشوار طوييييييييييل

ولا عمره فكر يوم يتوب

زي انا

لما لقيت الشمس رجعالي بلونين

ساعة غروب

من وحى الأعتكاف

قبل ما تقروا أى حاجة أحب أوضح أنى إنسان عادى جداً ، يعنى لا شيخ ولا فقيه .. ودى مجرد خواطر إسلامية خطرت فى بالى خلال فترة الأعتكاف فى المسجد واللى ماكملتش لأسباب يطول شرحها ، كل اللى عايز أقوله أنى مش حاطط البوست ده نصيحة لحد أو عشان أدعى لهداية حد ، دي مجرد وجهة نظر حسيتها وانا هناك ، فياريت اللى يقرا ويلاقى غلط مايهاجمش .. لأ ، ينصح .. وأنا والله مستنى النصيحة لأنى محتاج لها ..أتفضلوا أقروا
------------------------------------------------------------------------------------------
إن النور الألهى لا يأخذه العبد من الله ، بل يهبه الله للعبد ، فلا يكفى الأعتكاف فى المسجد وقرأة القرآن وكثرة الدعاء والأبتهال للسمو بالروح والوجدان وشفافية النفس وطهر القلب ، فلابد من الخشوع فى كل هذا والإيمان بالقلب قبل العقل واللسان ، والزهد الحقيقي فى الدنيا بكل متاعها ومتعها سواء كانت متع مادية أو أدبية أو غير ذلك
إن الأمر لا يخلو من معادلة صعبة ، معادلة يكمن حلها فى جوهر العلاقة بين العبد وربه ، والوصول إلى إلى هذا الحل يكون بالإيمان القلبى بقدر ماهو بالدليل العلقى إن لم يزد عنه ، فإذا أتجه الإنسان إلى ربه بالعقل فقط ، فصام النهار وأقام الليل وختم القرآن ودفع الصادقات وأكثر من هذا دون محبة حقيقية لما يفعل ، لم يصب مما فعل إلا الحسنة الأولى .. هذا إن أصابها ، فتراه يصوم بلا صبر ، ويقوم بلا خشوع ، ويقرأ بلا تدبر ويتصدق بلا سماحة ، بل يتبُع صدقته بالمن والأذى حتى يجلب على نفسه غضب الله ونفسه

رجاء

أننى أطمع إلى الله تعالى أن أخرج من هنا أفضل مما دخلت ، وأن أرتفع درجة بروحى نحو السماء علنى أصل لحقيقتى ، علنى أنتهى من هنا بسعادة حرمت منها طويلاً حتى أشتقت لها ، أننى أطمع فى الله أن أخرج من هنا أطهر قلباً .. وأكرم خلقاً .. وأعفى نفساً .. وأوسع أفقاً وإدراكاً .. وأغرز فكراً ، وقبل كل هذا أطمع أن أخرج بروح أكثر إيمانا وشفافية

مجدى موجود .... ؟؟؟

-1-
- أنا مش قادر أفهم أزاى تعملوا كدة من ورايا ؟؟
- كنت عايزنا نعمل أية يعنى يا مجدى ؟؟ نستنى رأيك ؟
- أقل ما فيها ..ولا أنا خلاص بقيت فى النسيان
- أهو اللى حصل حصل بقى ، ومفيش قدامك غير أنك ترضى بالموجود .. وإلا مش هتلاقى
- مش هلاقى
- 2 -
- هه .. كنت بتقول حاجة يا مجدى ؟؟
- بقول حاجة ؟! انا بقالي ساعة بكلمك
- معلش .. ما سمعتش كويس
- كنت سرحان فى حاجة ؟؟
- أبداُ ..يظهر أن صوتك أنت اللى كان واطى حبتين
-واطى ؟!! ... يمكن
- 3 -
- أنا شايف أنك مكبر الموضوع قوى .. الحكاية مش مستاهلة
- مش مستاهلة !! .. يتجاهلنى بالشكل ده وتقولى مش مستاهلة ؟؟
- يا مجدى .. بلاش سؤ ظن ، يمكن ما شافكش يا أخى
- أنت لسه بتدافع عنه .. بقولك عينى جت فى عينه ، وقفت وأبتسمت ومديت أيدى أسلم عليه .. خبط فيا وكمل طريقه عادى ولا كأنى هنا
- مش عارف أقولك أية بس ........... هو أكيد ما شافكش
- 4 -
- قلة أدب .. ميت كرسي فاضى فى الفرح ، والعيل المفعوص ده جي يقعد على رجلى .. لأ وباباه ومامته ساكتين ولا عملوا حاجة ، مفيش حتى عيب .. مفيش سيب أونكل مجدى فى حاله يا حبيبى ، دا قرفان وطالع عينه .. كأنهم مش شايفنى .. كأنى مش موجود ..أنت ما بتردش عليا لية أنت كمان ؟؟
-5-
- أمتى حصل الكلام ده ؟!
- النهارده الفجر ...بلع علبة الحبوب المنومة بحالها وساب وراه ورقة مكتوب فيها ( أنا مش موجود )
- لية كدة بس يامجدى .. تنتحر ؟! تخسر دنيتك وأخرتك
- والله هيقطع بينا ياجدع
- أيوة والله ... هتروح تعزي
- مش هينفع ... عندي شغل مهم ، هأبعت تلغراف تعزية وخلاص
- طب خد الـ 5 جنية دي وأبعت كمان تلغراف بأسمى .. أصل أنا كمان مش رايح
- بس أية حكاية أنا مش موجود دي
- علمى علمك

يا رب تكون الحدوتة واضحة ومفهومة

مع تحيات : واحد لسه موجود

مجرد سؤال

ممدوح أسماعيل خد برأة

السؤال بقى :

ليييييييييييييييييييييييييييييييييييييييييييييييييييييييييييييييييييييييييييييييية؟؟؟؟

فى التحويلة

كانت لحظة

عدى القطر فوق تحويلة

هز الدنيا

رج العربة

قامت الحلوة مالت حبة

وبعد ما كانت بنا بلاد

صبحت حتة

صبحت قربة

شوفت عيونها وقلت لنفسي

يحصل أية لو جت بين يدى؟

تحويلة تانية

مالت جامد

كدة ببساطة أتحقق حلمى

قالت أسفة

ورجعت خجلة

وأنا عن نفسي

روحت فى دنيا غير الدنيا

لسة السكة معانا طويلة

هى الدنيا كام تحويلة

حتما لازما

ميت تحويلة وتحويلة جاية

ضحك القطر من سرحانى

عارف أنى فى عالم تانى

هى اللحظة وقام صحانى

توت توت

وصلنا محطة

قامت الحلوة سابتنى ونزلت