الصراحة

الصراحة مش قزازة
وسط كل الناس تدور
وأنت أسأل ..
وأنت قول
الصراحة مش وقاحة
ولا تفتيش للعقول
مش سؤال محرج فى قعدة
ولا زنقة بالكلام
والمهم أنى أكشف
أى سر والسلام
الصراحة يا كرام
يعنى حب
يعنى عهد
أنى أفتح لك دولابى
إللى فيه أسرار سعادتى
وإللى فيه أسرار عذابى
لو هتدى حد غيرك
حاجة منه
فى حضورى..
أو غيابى
السعادة راح تزول
الصراحة مش وقاحة
ولا تفتيش للعقول

رباعية

في لحظة حب متعاجب
هأقولهلك بعلو الصوت
هأعيش وأموت واتحاسب
وأنا لسه بحبك موت

أنا حزن مستخبي

في ضحكة بهلوان

والجرح اللى في قلبي

متداري في الجنان

مرسوم بالف وش

كداب ومش باغش

وباخلى الناس فريش

مع انا زعلان

انا حزن مستخبي

في ضحكة بهلوان

مرسوم على وشي ضحكة

مع أني فاضلي تكة

والدمع يلاقي شكة

ويفيض الفيضان

أنا حزن مستخبي

في ضحكة بهلوان

مناخيري كورة حمرة

وعيوني زي جمرة

سكران ماشربش خمرة

م الغلب انا سكران

أنا حزن مستخبي

في ضحكة بهلوان

هدومي بألف لون

وعقلي اخر جنون

لكن وقت السكون

والوحدة ... في توهان

انا حزن مستخبي

في ضحكة بهلوان

السيرك هو خلي

وأفكاري عرض هزلي

وكلامي تراللي

محتاج له ترجمان

انا حزن مستخبي

في ضحكة بهلوان

أراجوز لحم ودم

وباغني تيرا ... رام

وبأزيح عن ناسي هم

وبأحايل في الزمان

انا حزن مستخبي

في ضحكة بهلوان

وأنا جنبك

وأنا جنبك
بأشوف الدنيا مرسومة
كما طريقين
طريق منك
طريق ليك
فراغ واسع مابين الأتنين
طريق منك وللعالم
مليه الشوك
وبحر شكوك
وأنا مجرد بشر عادي
لا أنا ساحر
ولا درويش
ولا مبروك
ولا حتى ببين زين
وانا جنبك
بأشوف الدنيا مرسومة
كما طريقين
**********
طريق ليك
بدايته الجرح في قلبي
واخره الدمع في عيونى
وقولة آه على لسانى
وصحوة عقلي في جنوني
تمنيني .. وأتمنى
الاقي الطرد م الجنة
وحاجز يتولد بنا
بأفعالك..
وبظنونى
أكدب عقل ده ممكن
لكن أزاى أكدب عين
وأنا جنبك
بأشوف الادنيا مرسومة
كما طريقين
*********
فراغ واسع
وأنا وحدي معلق فيه
مابين فكرة : أنا هأبعد
وبين حسبة : احبك لية؟؟
بحبك سر تعذيبي
وخذلاني
باكون للناس أنا واحد
واكون ليك واحد تانى
وأنا الصادق
وصدقي هو عنوانى
عشانك أتقسمت أتنين
وأنا جنبك
بأشوف الدنيا مرسومة
كما طريقين

يادوب لحظة

مابين الحلم واليقظة

يادوب لحظة

وفتحة عين بتتغمض ..على دنيا

وتفتح ..على دنيا

غير الدنيا

مابين الحلم واليقظة

يادوب ثانية

بيصحى لها خيال فنان

يايرسم لوحة في الضلمة ..

بلون الاحزان

يايرسم لوحة م الفرحة

في قلب الشمس والألوان

يايرسم لوحة بهتانة

خيال بهتان

وتبقى الصورة فزورة

ماهيش واضحة

مابين الحلم واليقظة

يادوب لحظة

في ألف كلمة آه

مش كل كلمة آه ..
معناها أنا موافق
في ألف كلمة آه ..
بيقولها متضايق
بيقولها متألم
مش قادر أتكلم
في جرحي أنا بلملم
وخلاص هنتفارق
مش كلمة آه ..
معناها أنا موافق
******
في ألف كلمة آه..
جواها مليون لأ
دي صرختى م الآه
خلت جبل يتشق
وأنتم قلبكوا مفيش
يعنى الحجارة أرق
أيوة الحجر بيحس
يهمس يقولي لا بأس
جوايا نفس اليأس
وخلاص مانش طايق
مش كل كلمة آه ..
معناها أنا موافق
*******
مش كل لحظة صمت ..
معناها أنا راضي
في ألف كلمة حمد
بنقولها ع العادي
عايشين على السترة
وحلمنا ببكرة
مانكش فيه نكرة
نفرح ونتعايق
مش كل كلمة آه ..
معناها أنا موافق

قصاصات

- 1 -

عارفك صعبة
فيك حاجة مستحيلة
كل خطوة بخدها ليك
ألف ميل
وألف ليلة
بس راضى لأني عشقك
أيوة 100 مليون بحبك
نفسي اجي والقى جنبك
كل احلامي الجميلة
بس عارفك لسه صعبة
فيك حاجة مستحيلة

-2-

لسه لوحدك
رغم صحابك .. رغم حبايبك
ياللى تراب الارض دا عشقك
ياللى عشانك انا متحير
انا بتغير
واتعلمت الحب الجد في وق قصير
علشان اقدر اقولها .. بحبك
لسه لوحدك