فضفضة مش أكتر

-1-

ساعات بأبقى عايز أكون لوحدى

بأبقى عايز أحبس نفسى فى صد فتى وأبكى بصوت عالى

لكن مابقدرش

عشان حتى وأنا جوا الصدفة

بألاقيكى ويايا

-2-

مفيش راجل بيبكى

قصدك أية؟؟

أن أنا مش راجل

ولا أن اللى فى عيونى دى مش دموع

-3-

ربانى كويس قوى

عملنى أنى أكون حر ومحدش يغصبنى على حاجة

فهمنى أن كلمة لأ أحلى من كلمة حاضر

و أول ما قلت له لأ قالى

أنا معرفتش أربى

-4-

وقفنا نتكلم أكتر من ساعة

كانت عمالة تشتكى لى من خطيبها

وتقولى أنها بتفكر بجد فى فسخ الخطوبة

عدى علينا أكتر من بياعة فل ومناديل

:تعرض بضاعتها وتقول

أشترى منى ربنا يخليكوا لبعض

ولما أفترقنا اخر النهار محدش فينا سئل نفسه

إن كان ربنا أستجاب لواحدة من البياعات دول

ولا لأ

-5-

لما يكون لك مليون صاحب

وأسرة وبيت وعيلة

ومع ذلك

مش لاقى حد يفهمك فى أوقات حزنك وشجنك

مش دا برضة معناه

أنك أنسان وحيد

-6-

جالى وعلى كتفه كل مشاكل العالم

قعد أكتر من ساعة يتكلم ويشتكى

وختم كلامه بطلب بسيط

أصالحه على الدنيا

حسيت ساعتها بنفس أحساس (محمد صبحى) لما(عبلة

كامل) طلبت انه يرجع لها نظرها فى مسرحية

وجهة نظر

....لكن للأسف

مقدرتش أكون بشجاعة (عرفة الشواف) وأقوله أن أنا مش الدكتور

-7-

كنت بدأت أحس أنها أتغيرت

الطيبة المتناهية بتقل

رقة الملايكة بتختفى

نظرات قاسية بتفلت من عيونها فى المواقف الصعبة

لكن لما شفت دموعها وهى بتسمع فيروز

عرفت قد أية أنا كنت غلطان

-8-

قالى ان الفيلم جامد...فوق الممتاز

خلانى أجلت شرا الرواية الجديدة ومشوار مكتبة

الأسكندرية عشان ألاقى وقت وفلوس للسينما

نظرة الأنبهار فى عنيه أكدت لى انه صادق

وأن الحكاية مش مقلب

لكن لما دخلت السينما..عرفت كلمة (جامد ) لها

معنى مختلف عنده

-9-

حاجة تحير

هو أنا دايماً إللى باجى متأخر

ولا القطر هو إللى دايماً

بيطلع بدرى عن ميعاده

معرفش....