تمانية...سبعة...سته..خمسة..أربعة..تلاتة..أتنين..واحااااااااااااااااد
كدة يبقى العام الجديد أبتدا من 8 أيام....كان المفروض أن البوست ده يتنشر أول يوم فى السنة الجديدة ،أتأخرت شوية،معلش..ما أنتوا عارفين بقى زحمة الأمتحانات..وخلينا فى المهم بقى..أيه هو المهم؟؟ المدونة الجديدة طبعاً
أولاً ( للزوار الجدد ) :أنا مين؟؟
الأسم : محمد عبد القوى
السن: دي مسائلة نسبية..بس أنا كملت الـ21 سنة يعنى راجل رسمى
الديانة :بلاش غباء..ماهو باين م الأسم والحمد للة على نعمة الأسلام
الجنسية : ما أعتقدش أن فيه محمد عبد القوى مش مصرى..أنتمى لقريتى فى المقام الأول وللأسكندرية فى المقام التانى..ومحدش يسألنى بلدكم تبع محافظة أية؟؟
الهواية : الكتابة بشكل عام..والشعر والمسرح بشكل خاص ( بس مفيش شعر هنا )..يعنى بتاع كله
ثانياً : عملت المدونة دى لية؟؟
واحد صاحبى - بعتبره أستاذى - أتكلمت معاه على مدونتى التانية ..قلم الحرية..واللى ما بدونش فيها غير الشعر..حسيت من كلامه إن كون المدونة للشعر بس دا عيب فيها ، وأن فيه ناس كتير هتبطل تزور مدونتى لأنها شعرية ...وأنى المفروض أعبر عن اللى جوايا بصورة موازية للشعر ما دمت قادر على ده
يمكن هو ماقصدش ده كله...و الحقيقة هو ما قلش كده بصورة مباشرة ،لكن ده مايمنعش أنى أقتنعت بعد مهلة تفكير مش طويلة بالكلام ده..وساعدنى فى ده كام زيارة لمدونته وقراية المواضيع اللى فيها..حسيت هناك بتدوين مختلف و أعمق ولأكتر من سبب..مش الأدب والسياسة بس
حبيت النقطة دى قوى ..وأفتكرت بوستات كتير مأجلها لحد ما أقدر أكتبها فى شكل شعر أو زجل ،دا غير كتب وأفلام كان نفسى أكلمكم عنها لكن ماكنتش عايز أكسر القاعدة...وبالطريقة دى أتولدت المدونة الجديدة واللى أتمنى أنها تعجبكم عشان تستمر
هنا هنتكلم عن كل حاجة وأى حاجة..المهم أن الموضوع ده يخلى الفراغ اللى جوانا يقل..ويدينا وجهة نظر
مني..منك..منه..........أهو..هنفكر سوا
هناك 5 تعليقات:
ان تشارك الاخرين تجارب انسانية متنوعة
افكار متنوعة
احلام متنوعة
مش شرط في مجال واحد او اتنين او تلاتة
لا في كل المجالات
احيانا قد تتفق مع الاخرين
وربما قد تختلف معهم
لكن في جميع الاحوال ..تجربة التدوين تجربة ثرية ومفيدة
بانتظار التدوينات القادمة
ان شاء الله تكون مدونة حضرتك النثرية اضافة لعالم التدوين
تحياتي
حلم الحرية
التدوين أفق جديد بيتفتح قدام جيلنا المطحون ،ضربة حظ كويسة على خلاف التيار السائد بتدينا الفرصة أننا نتكلم ونعبر عن نفسنا بحريةفى الوقت أللى أصبح فيه الوصول لجريدة وأذاعة عشان تقول رأيك أصعب من عبور المانش ودخول كاس العالم
شكراً لتعليقك وأتمنى أكون عند حسن ظنك وظن الجميع
مبرووووك مبروك مبروك مبروك وعقبال ما تجوزها
جاليليو
الله يبارك فيك..وعقبال سحابتك ما تمطر
-------------
ملحوظة للى مش فاهم: مدونة جاليليو أسمها سحابة وتعدى وأنا بأستظرف عليه..غتاتة يعنى
عجبني اسلوبك البسيط الي بينم عن صدق التعبير لكن عمقه بنفس الوقت
متابعة إن شاء الله....
وإلى الأمام
إرسال تعليق